Baş səhifə Siyasət İqtisadiyyat Cəmiyyət Müharibə Şou-biznes İdman Kriminal Son Xəbərlər
Son Xəbər Mədəniyyət Dünya Avto-Moto Hadisə Hava proqnozu Maraqlı Müsahibə



01 Avq
2019
12:24
825



“Culture Guide” mədəniyyət bələdçisinin avqust nömrəsi çapdan çıxıb

“Bakı dünyəvi bir şəhərdir, zəngin tarixə, UNESKO-nun Dünya İrs Siyahısına daxil olan sahələrə malikdir. Biz dünyanın müxtəlif yerlərindən paytaxt şəhərinizə toplaşmışıq. Bu, bizi bir araya gətirən dəyərlərə, ümumi tariximizə, bölüşdüyümüz məqamlara bağlıdır. Mən Azərbaycan Respublikasının rəhbərliyinə səmimi qonaqpərvərliyə və üzv dövlətlər üçün yaradılmış şəraitə və xüsusi mühitə görə təşəkkürümü bildirirəm”.

UNESKO-nun Baş direktoru xanım Odre Azulenin Bakıda keçirilən Dünya İrs Komitəsinin 43-cü sessiyasının açılış mərasimində dediyi bu sözlər “Culture Guide” mədəniyyət bələdçisinin yeni çapdan çıxan nömrəsində bir daha diqqətə çatdırılır.

Ölkəmizə təşrif buyuran qonaqlara Azərbaycanın mədəni irsi, incəsənəti, sənət ocaqlarının fəaliyyəti, eləcə də bölgələrimizin mədəni palitrası barədə dolğun məlumat vermək, onların ölkəmiz barədə təəssüratını yaddaqalan etmək məqsədlə ərsəyə gələn “Culture Guide” kataloqunun avqust buraxılışı da mövzu və materiallar baxımından zənginliyi ilə seçilir.

Mədəniyyət Nazirliyindən  XeberOxu.Az-a bildirilib ki, “Baku Guide” MMC tərəfindən ingilis və rus dillərində hazırlanaraq nəşr edilən mədəniyyət bələdçisi Azərbaycan haqqında, ölkəmizin keçmişi, müasir inkişafı, mədəniyyətimizin tarixi mənzərəsi ilə bağlı təqdimat yazısı ilə açılır. Yazıda müsəlman Şərqində ilk peşəkar teatrın, kinematoqrafın, operanın Azərbaycanda yarandığı diqqətə çatdırılır, ölkəmizin müasir dövrdə mədəniyyətlərarası dialoqa töhfələrindən, son illər bir çox beynəlxalq tədbirlərə ev sahibliyi etməsindən bəhs olunur.

İyunun 30–dan iyulun 10-dək Bakıda keçirilən UNESKO-nun Dünya İrs Komitəsinin 43-cü sessiyası da bu il ölkəmizin mədəni həyatında ən mühüm beynəlxalq hadisədir. Nəşrdə Azərbaycanın Dünya İrs Komitəsinə üzvlüyü və cari ildə bu qurumda sədrlik etməsi, 43-cü sessiyasının gedişi, qəbul olunan qərarlar və ümumilikdə UNESKO-nun bu mötəbər tədbirinə ev sahibliyinin ölkəmiz üçün əhəmiyyəti barədə söz açılır. Həmçinin paytaxtın mədəniyyət ocaqlarında xarici qonaqlar üçün təşkil olunan tədbirlərdən bəhs olunur.

Eyni zamanda, “Culture Guide”nin yeni buraxılışında ənənəvi olaraq şəhərdəki mədəniyyət müəssisələri haqqında təqdimat-tanıtma səciyyəli informasiyalar verilib. Sənət mövsümünü başa vurmuş teatrlar və bir sıra konsert müəssisələri avqust aynda istirahətdə olsa da, digər mədəniyyət ocaqlarının – kino zallarının, qalereyaların, eləcə də əyləncə məkanlarının bu ay üçün də maraqlı tədbirlər proqramı var.

Nəşrdə Bakının hər zaman xarici qonaqların diqqətini çəkən tarixi və müasir memarlıq nümunələri, İçərişəhər, minilliklərin daş yaddaşı olan Qobustan, Atəşgah məbədi və Yanardağ haqqında məlumatlar, turistlərin ölkəmizdən özləri ilə hansı suvenir və “dadlı xatirələr” apara biləcəklərinə dair tövsiyələr verilir.

“Culture Guide” kataloqunun hər nömrəsində ölkəmizin dünya mədəniyyət xəzinəsinə töhfələri, eləcə də paytaxtla yanaşı, regionlarımızdakı dünya əhəmiyyətli mədəni irs nümunələri barədə yazılar dərc edilir. Nəşrin avqust buraxılışında UNESKO-nun Dünya İrs Siyahısına yenicə daxil edilmiş Şəkinin tarixi-mədəni irsi, eləcə də Bəşəriyyətin qeyri-maddi mədəni irs siyahısında yer alan nümunələrimizdən milli muğam sənəti, Azərbaycan xalça sənəti, Lahıc misgərlik sənəti barədə materiallar təqdim olunur.

“Qarabağ – Azərbaycanın mədəniyyət beşiyi” adlı yazıda əzəli yurd yerimizin mədəni irsi, işğal altındakı torpaqlarımızdakı mədəni sərvətlərin dağılıb-talan edildiyi əcnəbi oxucuların diqqətinə çatdırılır. “Keçmişin abidələri – tarixin izləri” başlıqlı yazıda isə Azərbaycanın qədim abidələr diyarı olduğu müxtəlif nümunələrlə qeyd edilir, tarixi abidələrin mühafizəsi və bərpası ilə bağlı görülən işlərdən söz açılır.

2009-cu ildən etibarən hər il keçirilən Qəbələ Beynəlxalq Musiqi Festivalı dünya musiqi xəritəsində özünə layiqli yer qazanıb. “Bir həftə musiqi və ömür boyu təəssürat” başlıqlı yazıda Qəbələdə 11-ci dəfə keçirilən festival barədə məlumat verilir.

“Culture Guide” avqust ayının mədəniyyət təqviminə də nəzər salır. 2 avqust – Azərbaycan Kinosu Günü və milli kinematoqrafın tarixi, 17 avqustda (1942) anadan olmuş dünya şöhrətli müğənni Müslüm Maqomayevin həyat və yaradıcılığı haqqında yazılar bu qəbildəndir.

Nəfis tərtibatda hazırlanan mədəniyyət bələdçisində hər ay görkəmli rəssamlarımızın məşhur əsərlərinin reproduksiyasına yer verilir. Bu dəfə “Culture Guide”ın ilk səhifəsində Əməkdar rəssam Ələkbər Rzaquliyevin “Şəki darvazası” qrafik əsəri əks olunub.

Xeberoxu.az



© Materiallardan istifadə edərkən hiperlinklə istinad olunmalıdır

Bizimlə əlaqə saxlayın



Bizi Telegram-da oxuyun. Azərbaycanın və dünyanın ən vacib xəbərləri
Ən Çox Oxunanlar







"Stadler" Bakı-Tbilisi-Qars dəmir yolu üçün yeni vaqonların gətiriləcəyi VAXTI açıqladı







Los Anceles sinaqoqunda Azərbaycanın tolerantlığına dair təqdimat keçirilib







Azərbaycanda narkotik vasitələrin qanunsuz dövriyyəsinə görə həbs olunanların SAYI







Bakıda kommersiya obyektləri və torpaq sahələri cüzi bahalaşıb


Digər Mədəniyyət xəbərləri


Xeberler 2018 və son xeberler 2019 düzgün, tez və Azerbaycanda en son xeberler bugun birinci oxumaq üçün XeberOxu.az saytını izləyin. Xeberoxu.az Azərbaycanın xəbər saytı, Azərbaycandan ən son xəbərləri yayımlayır. Iqtisadi xeberler, Şou biznes xəbərləri , siyasi xeberler, kriminal xeberler, idman xeberleri, muharibe xeberleri, maliyye xeberleri təqdim edən ictimai-sosial saytdır.




© Xeberoxu.az 2019 Müəllif hüquqları qorunur. Məlumatdan istifadə etdikdə istinad mütləqdir. Məlumat internet səhifələrində istifadə edildikdə müvafiq keçidin qoyulması mütləqdir. (012) 436-28-31, info@xeberoxu.az